એકતાનગર (નર્મદા), 3 ઑક્ટોબર, 2023 : પ્રતિષ્ઠિત ICC મેન્સ ક્રિકેટ વર્લ્ડ કપની ટ્રૉફી ક્રિકેટ વિશ્વની શ્રેષ્ઠતા અને એકતાની પ્રતીક છે અને એકતાનગરમાં સ્ટૅચ્યુ ઑફ યુનિટી (SoU) પણ સમગ્ર વિશ્વ માટે ભારતની એકતા અને પ્રતિબદ્ધતાનું પ્રતીક છે, ત્યારે આ ટ્રોફી સ્ટૅચ્યુ ઓફ યુનિટી ખાતે પ્રદર્શન માટે મુકવામાં આવી છે. ટ્રૉફીના વૈશ્વિક પ્રવાસના ભાગરૂપે એકતાનગરની પણ ઐતિહાસિક મુલાકાતનું આયોજન કરવામાં આવ્યું છે.આ ટ્રૉફીને અવકાશની સાથે ૧૮ દેશોના પ્રસિદ્ધ સ્થાનોની મુસાફરી કરાવવામાં આવી છે.
મંગળવારે ક્રિકેટ પ્રેમીઓ અને સ્ટૅચ્યુ ઓફ યુનિટીના મુલાકાતીઓને આ ટ્રૉફીને નજીકથી નિહાળવાની દુર્લભ તક મળી હતી. સ્ટૅચ્યુ ઓફ યુનિટી ખાતે ટ્રૉફીની મુલાકાત ક્રિકેટની લોકપ્રિયતા અને વિશ્વભરના લોકોને એક કરવાની તેની ક્ષમતા બતાવે છે.
ICC મેન્સ ક્રિકેટ વર્લ્ડ કપની ટ્રૉફીએ આ વર્ષની શરૂઆતથી જ તેની અદ્ભુત સફર શરૂ કરી છે. આ ટ્રૉફી પૃથ્વીથી 1,20,000 ફુટની ઉંચાઈ પર આવેલ સ્ટ્રેટોસ્ફિયર સુઘી પહોંચી હતી અને ટ્રૉફીની આ રોમાચક સફરને અખબારો અને ટી.વી. ચૅનલ્સની હેડલાઇન્સ બનાવી હતી. ટ્રૉફીની રોમાંચક અને ઐતિહાસિક સફર દરમિયાન તેને વિશ્વભરમાં વિવિધ પ્રસિદ્ધ સ્થળોએ લઈ જવામાં આવી છે કે જે તેને એકતા અને રમત-ગમતની શ્રેષ્ઠતાનું પ્રતીક બનાવે છે.
